Muga Gaindituz garaikurra: “Dudarik gabe partida oso gogorra izango da biharkoa”
Asier Zubia, DRT Senior Mutilak taldeko kapitaina da
Asier Zubia otxandiarrak hamarkada bat baino gehiago darama DRTri lotuta eta aurten seigarren urtea izaten ari da Senior Mutilak taldean. 21-22 denboraldian bere papera eta erantzukizuna areagotu egin da kapitaina izatea egokitu zaiolako. Berarekin taldearen liga hasiera errepasatu dugu eta biharko partiduari begira Sarako Izarraren aurka Muga Gaindituz garaikurraren berri ere galdetu diogu.
Asteburuan Euskal Ligako 6.jardunaldiari aurre egingo diozue Sarako Izarrak taldearen aurka eta era bera II.Muga Gaindituz garaikurra ere jokoan izango da. Nola espero duzue izatea partida?
Azken bi urteotan askotan neurtu gara eta oso ondo ezagutzen gara. Partida oso politak izaten dira jokatzen ditugunak baina exijentzia handikoak ere. Dudarik gabe partida oso gogorra izango da biharkoa.
Aurreko partidan Bera Bera Bren aurka irabazi eta gero konfidantza handiagorekin aurre egingo diozu partida berezi honi?
Dinamika txar baten sarturik egon gara eta asteburuko garaipenak asko lagundu digu eta horrek animoak aldatu ditu.
Kapitain moduan, nola ikusten duzu taldea?
Talde gaztea da, nabari da beterania kutsu bat falta dela, baina etorkizun epe laburrera proiekzio handikoa izango dela usted dut. Dena den taldea gogotsu dago eta aurtengo denboraldia aurrera aterateko motibazioz beterik.
Lesioek liga hasiera markatu dizue. Pixkanaka taldekideak errekuperatzen doaz?
Lesio aldetik denboraldia ez da erraza izaten ari eta pixkana batzuk bueltatzen ari dira, baina justu gabiltza.
